Dr. Hunibou Newmai

Liangmai Rahchengh

Aliu Liangmai niu ‘Charah-chengh’ chiwsai Charah niu kalungbo lunlung tu dinne. Liangmai katingmai niura ‘Charahwang’(Maluongrah: demi-god/godhead) gu lungbo lunlung tu alihjiu khaddi pahniu pagu phaimiuh kakungh dung niu chamangh khungmengbo ga champi-ladpi khaibo saih swijiu kaniuh-kariibo, tanya thiurabo jai khaddi katam tambo chamai niu thin-lung rabo lam ga maniujiu lungbam niw-e. Kanambo ga ‘Amang Jou Hubo’ naih charah, chakhou khaddi chamainah niu lung rabo jai-alih hina masan padjiu lung npe miye chiwjiu katingmai niu malumme.

Manaa luonbo (Rebirth)

Liangmai rahchengh niu manaa luonbo tu malumme. Kadi nai charuih khaddi mathad-baam(Hell) tu malumme. Liangmai rahchengh ga kashaimai niu tuhoi aliu kadi ga lungbo wan kum charuih ga kumh lunglan raye chiw malumme. Chamainah shaikum dasai karingmai nai kashaimai gu ramrai thiujiu luang bambo ‘Chakaagiu’ kenpad misai kadi ringting tu ma’ngai mimiye chiw dinne. Sigasu, Kadi riga wah kadibo hina charuih ga siamme; sikumjiu charuih ga kadii hina kadi ga siamme chiw lukhaiye. Sibo madanh sera Kuiluong gu tubuk ga bambo ‘Charuih N-Niw’ side. Chamainah shai maji mimai niu lung wang lanrai raye chiw malumme. Siniu, kikhun khat ga ngenah shai misai lung wanglan majilo chiwjiu pagu madanh leng papum patun khat ga akyi (black charcoal) taai khaijiu siniu makhen(mole) thiujiu lungwang-e chiw malumme. Chamai pah nkhai kasha maira shaikum charuih dih ga ngut tang makjiu palung lilan makthen khoulyi jutjut wangjiu kanambo ga kajik duikum joutap kum mathad-baam ga bang khailujiu masuk kin kiusai pamik tagai muniu raubi, ngaang phui khangsai thurengk niu pamik raubi chiwjiu lung kamin simakjiu mathadle sua chiw din bam niw-e. Kadi riga lungjiu bambo aliu chamainah di aliu singnamai Tingwang bensiam khouring khaddi shingbang shingnuu tu nkhi mawikhai maksai ting thiyubibi khangjiu kanambo ga Kulyimih toujiu kadi pakiangna ruthon miraye chiw malumme.

Liangmai Naga gu Kalungbo Jai

Liangmai Zad hai Maipiw mainiu kikhun maksai kiriang-rui hai thinbo (patriachal society) zad khatle. Kadi-charam, tathuh-charah padbo ga khaddi chamih-chawanh thiubo maksai katam taambo namlad ga npuimai palad khaimakge.

Nam thombo

Palunlung thiujiu Liangmai zad niu namsan thomsai tam kachangbo ga kiphiu sum aruonglu tad raye. Plamra, pasai kanah paliu kikak ga tathuh-charah maksai chamao-chamien padbo wan ga pawangkhai thiujiu pak khailu tathuh-ramjiu chawee kamra maksai tanao-tanaa thiubo wan gadi kiliang nia kak ga lamchap thiura pageng bamme chiw dinne.

Tanao-tanaa thiubo

Liangmai, kating kien gara tanao tanaa thiubo hai maning makung suuijiu luhboweh. Liangmai chengh ga npui npiw khat khat tu ngao chalungsajiu bamdi pahang ga raokhai bammai kak gara wadaodi npui npiw thiujiu nfiujih nyiuhweh khaddi majanglung nyiuhweh chiw katingmai niu din bam niw-e.

1. Papiu nao (papiu padbo mai khat niu saokhai diabo kamihpui maksai taah khaibo pui) tu wadao di majang lung nyiuhweh.

2. Patan-papyu/tanpui tanpiw naopui naopiw thiujiu majang lungbo suimakge.

3. Patanpui naah tu panao leng lulanbo suimakge.

4. Panaai nai pagyiu naopui naopiw thiujiu majang lungbo suimakge.

5. Pamoo (Pnah nao) tu madiuhbo suimakge. Pachi pasingnaa nao tu madiuh lanbo di daolak siak maksai pikam khai makge.

6. Pataa kathiu maitu naopui naopiw thiujiu majang lungbo suimakge.

7. Papiu tamdi puikhat niu ponbo singnah tu naopui naopiw thiujiu majang lungbo suimakge.

8. Naokhia pachengh makge, khangkhat leng wimisai khangkhat leng shaye chiw dinne.

9. Tajuok nam thiubo jeng niu chaliw lumak daolakjiu kiliang karai kak ga luhbamdi pouphek luon sum tangmi maksai lu nyiuhweh chiw dinne. Sichiwjiu, pouphek luon summi tahdi patanpui kapadmai khat tu panao leng lumi dasai panao kinahmai nai kiliang khat thiujiu kabui malungkjan tiuh aruong suitah miraye. Siniu, pataanpui tu majang lungbo npiwmai kikhunse papouzan gasu kiliang taam padlu kabui malungk jan tiuh tam miraye. Siniu, Liangmai kak ga ‘sinaapou taamai, wuinapou taamai’ chiwjiu kiliang kasembo kengjiu padboweh.

10. Tanao lad dinloi makjiu paky ga panao tu mai majang wang nyiuweh. Npuimai khat niu paky ga pakinaa rabopiw tu palad-palui din makhah ga majang wang pachengh makge. Maikhat niu haichiw kaamsai papui,papiu khaddi papyumai tu kam cha’ngamjiu shaijiye chiwjiu nping charah bam niw-e.

Chamanh luhbo

Liangmai chengh ga npuimai khat chamih thiubo wan ga paman pagyih pilu chamih thiubam niw-e. Kating chengh gara chaman lubo hai chamihpui tu maikimai niu chakhuong thiukhaibo khat thiujiu luhweh. Palamra, paman- pagyih luhbo hai panah tu chapot kajon kumme chiwjiu aliu sitanglu makjiu maning maobo bamdi suiye; chiwdi apou ape niu lukhaibora chamihpui man luluhbose papyiuhmai, papoumai khaddi pakaa kachang (kikhunmai kaa) tu sise pasuat suat ga njan khailu pasai kanah mainiu wuinahpui tu majom-malaa wangbo wan ga chap-guu khairachamanse luhboweh.

Ngenah khat lungwangbo khaddi Khangchiuh Liwchiuhky achakbo Kating kien gara Liangmai kikhun ga ngena khat lung wangbo hai mathiu charuong niu suijiu kalek thiulubo gasu lung wangbo naah, lung-maomen khaibo gasu lung padbo naah khaddi chakhaana nah chiwjiu charoung niu lukhaibo jai taam taamme. Papiulun simakbo chakhaana nah tura kaitingmai kien gara lung-khouraa siye chiwjiu ngena lung wangbo wan gasu kamshatmi miye! Langmai chengh ga ngena lungwang machang tajumh gyiye. Ngena kasan lung wangbo ga nkhikhai maitu katiuh kuhlu pitiuh khaibo ngamdi kamme. Sisetu “Alaam Teh kuh” chiw katingmai niu dinne. Ngena lunglubo saih chahiuh nia kumbo ra kyningmai khaddi pakaa paphen mainiu ‘Manah thien’ thenjiu chakhah-chami langklu tiuhwi wibo ngena puitu pitiuh pisak khaiye. Nahmai khat niu khangnah liwnah thiukhangjiu khangchiuh liwchiuh ga achak suibo wan wang misai “Aloubo” tiense kamkhai raye. Haibo wan ga papitham got lujiu nam ga singku khaddi kiphiu gu kating mai niu priga thoikhaibo

tiense kamkhai raye. Npiw mainah khat niu papum lyilu chabuonmai khat niu tensuibo pum thiukhang mibo wan ga Khangchiuh, Liwchiuh ga achakjiu meng jihmi raye. Haichiwjiu, ‘Khangchiuh’ nai ‘Liwchiuh’ gasu Khangpi Liwpi chamai nah khat thiujiu charuong ga lung rabo kadi chengh pakhiangna katilu kalek thiujiu lung suhboweh.

Kaleklot

Liangmai kikhun khat ga papiu leklot lubo hai naoduunbo nah npiwmai ting kachangbo piw niu kating kien lamra lubam niw-e. Chiwdi, Makuiluongdih charahnam lung npekbo wan ga mawangbam niwbo Munhu. Nguibou nah Munhu. Kadingbou (naoduunbo nah) niu naami chiwdi naokhenah Mn.Magangtubou / Nammagang niu tinghmi chiwbo gasu kalek lot lam ga chakhuon padjiu Charah ladzan ga Naoduunbo nah Kadingbou niu ngamlu papiu leklot lumibo saihsuh Liangmai zad hai nao-duunbo nahpiw naakachangbo niu kalek lutad miye. Naoduunbo nah npiwmai nahraibo niu papiu gu kaleklot lubohai zad hina chengh ga bamkaambo ngao padle.

Liangmai chengh ga npuimai nah leng kaleklot pimakbo lam Liangmai zad gu charam hai palunlung thiujiu maikhat niu charam lwijiu bamdi charampou sera Kiphiu mathiu niu thiuweh. Liangmai gu chakhiu-chalanh ruong ga kung kachangbo sera kadi-charamme; sise hahsai padi-param kahahmai thiujiu lungsi lakbo duon niu maizad maksai maikiphiu leng pirabo chiwbo hai taduon- tanuu leng maning khaibo ga mengh kachangbo ngam khat thiujiu lukhaiye. Sijeng niu, kikhun ga npuimai leng kaleklot thiujiu pisai mai katammai kiliang maksai zad lam khungmee khaimibo wan ga pasai-kanah chakhuon-charah maksai tathiu-chari padra bambo jengniu charam thiujiu pimakboweh. Sibosung, npui mainah khat niu paky ga aliw thiujiu bambo luon ‘Liwlek’ thiujiu khouring pi makot tam khaiye; chaluh bitam khaijiu siga geng lubo hina khaitam khailu pasai pahniu chamih meebo wan ga paleng pikhaijiu phung meeye.

Apai Phom

Liangmai chengh ga kiluong maksai Luongriang ga, chamaoh-chamenh khaddi tathuh-charah padbo wan ga Apai phom niu maji nkhui ladzan thiujiu nam ga agee-manaaijiu lungra karaamme. Nam ga Lakpiw mai khat niu pagu takum riakcharuk(60) tangmisai Apai phom ga jousui mide. Chiwdi papui papiu phenmai kengbam khahthen haibo kating ladzan phom ga joubamdi katingmai suong ga palad chamkak khaimakjiu paliu lad kawi kasha nkinglu pasai taduon tanuu leng kadenjiu lungkin diye. Nam akhat gu Apai phom ga ting kachangbo piw setu ‘Aku’ chiw kuhweh. Pahniu tathuh- charah hina ladzan ramjiu lungkin diye. Aku piw hai kating thiuwangjiu chalad chalui ramkung misai patu malin lanrabopiw maksai katingmai ruong ga maringh marakmai khaddi chunthiumai khat tu “Pah Munthin” leng khailu pasung chalad-chalui ramhjiu ladzan tadkiuweh.

Chamaoh-Chamenh

Liangmai chengh ga lung ncham bambo nam akhat ga chamao h-chamenh padbo wan ga pahang ga raokhai bambo jai ga Naam gu Apaimai mai niu tathuh-charah gu ladzan ramme.

1. Liuhsih lutiuhbo Mai khat niu pamao kahahmai tu pa-arat niu pamao madam khaijiu kabuak padbo wan ga -praa thiujiu mai makhaa, agaabo, maksai maitu chalad maduotlu dinbo masanjiu silubo wan ga mai makhaah, manyiunih madam khaibo jeng niu priga Apai mainiu kiluong ga kabak dii thuhbo (kiluongdiet) phiulu pi majon khaijiu katingmai niu langk tiuhlu chalad ramme. Liuhsih luh tiuhbo ga khangkiangmai ronna jousuiye.

2. Mainaoki kiubo

Maipiw khat nao tu maksai kamihpui khat pagu npad ram makhahmai maksai maikhat niu panao leng chalad dinloi mibopui (mai naokham) tu npui npiw thiujiu nfiujihjiu lungmao khai dasai maitu kalungkjeng simakge chiwjiu priga mawaah khaibo puikimai nai pakinaa kimai aruonglu lung mawaah khaibopiw tu rikhum lujiu

kashai kathiyu katang pad paddle. Haikumbo padbo wan ga kamaobo piwse pa’wangkhai phiujiu kiluong katamh lam pak khai khaiye. Sichiwjiu, chakhuon charah dii padjiu kashai kathiyu pad makhah ga ‘chaheng cha’ngiw mun dombo’ ngamse katingmai niu kamkin diye. Haibo ngamse kammi dasai chalung poam bamdi kikhun mainiu kamaomai riga chaben khailan suimakge khaddi paky bibo suilakge. Apaimai niu ladzan ramkiujiu kamaohbo piw riga majon kadiibo luhlu patu kiluong gasu takum 3 maksai 5 haa padmi raye.

3. Npuimai tu manomjiu minbo

(a) Liangmai kating chengh ga maipiw khat niu mainao khat tu manomjiu min masha khaidasai mainaoky kiubo suong chakhuon charah didiang-e. Mainaoky kiubo sera naopui nai npiwmai chunjuanlu lung mawaahbo leng lukhaiye. Chiwdi manomjiu minbo sera npuimai niu suimakbo ga matanjiu lung maobo tuweh. Siniu, haikumbo mai tura pak marihlu makjiu mintou lusai ringpad lanjuh makge. Haikumbo padbo ga naam gu Apaimai niu ladzan thiu masukjiu tadkiu kiuweh. Paky paluh ratlu majon kadii lulujiu patu naam gasu paringting leng thiujiu haa thonmi miye.Chiwdi Liangmai zad ga mainao tu manomjiu minbo sera paddi padju makge; haikumbo kakengra chunjonlu lung maobo sipad lubo ga maipui kakeng niu paliu ping lamsu manomjiu minbo leng madam khaibodi hah makge.

(b) Liangmai kating chengh ga riliwmai khat tu manomjiu lungmao dasai naam ga ladzan pakhiang nase mainaoky kiubo wan ga kum pathiak nchamjiu tadkiu suneh. Chiwdi, aliwmai seniu khaddi patan papiyu mainiu suisai patu manomjiu minbo piwnao leng khaitajut mimiye. Riliw mainiu rikhangmai khat tu maraijuu mijiu paphairi jamme maksai parapien luweh chiw madam misai kating chengh ga kamaobo piwnao leng khaibo niu keng-(e) Haikumbo parapien lubo maksai paphairi jamme chiw madambo sera rikhang mainiu panao leng luhra suinimak dasai ‘Mawaatat’ lukhailu tah mibodi bamme.

4. Chamaoh maohbo

Maikhat niu pah namron lamsu maikhat tu tathiu-chakhou leng ngao mao khailu kamshat midasai kalangjiu ‘pawangkhai’ leng phiulu Apaiky ga kabak maksai kabui kamshatlu ‘Chahengh cha’ngiw mun dombo’ ngamse kamkhaimi raye. Haichiwjiu, kating chengh ga ‘chahengh cha’ngiw mun dombo’ tiense tenkhaijiu tazai lukiuhmi dasai kashai kathiyu padbo kikhunmai niu kamaohbo khou riga chaphi chaben khailanbo suitah mide. Chamaoh chamen padmi dasai kawi thiulu bamdi kamaoh kammibo mainai kashai kathiyu padbo kikhun nam akhat gara lung aruong pachengh makge, duikhun akhat ga tadui thuak sak aruong niuhweh,chakhuihye chiwjiu takum 5/7 naam gasu haapad miraye.

5. Laddan Tathu-chara padbo wan ga Apaimai niu ladzan ramkhaibo mathiu chunchamjiu suikhailu dasai Laddan gu thiujiu kamaobo piw niu kabak kiluongdet khat majon raye.Chiwdi Apaimai gu Laddanse suini makmai bamjiu chuncham lumak misai Laddan gu kabakse luson makge khaddi ladzan ramkhaibo sedi luson makjiu Luongring gu Apai phom ga tathuhse kamluon lan lanne.

6. Apou-ape cheng ga tenbam niwbo kawibo kasia

(a) Chawat/chahot masanbo: Apou ape kien gara khat khat tu nkhahjiu katan-kanuh mai mathiu aruong lujiu khat khat ngam chiwbora chaky chaluh kamnkhahjiu tatien ten machambo tu chawat/chahot mawatbo maksai mahotbo chiw kuhweh. Chawat mawatbo haira npui npiw, katan ka-nuh thiuson makjiu mathiu alamhlu ten aruong-e. Pawan pawan ga chamai kaliriu riubodi suiye.

(b) Miting: Miting chiw kuhbo chawat phom sera npiw mai maksai npui mai chiwjiu tam tamjiu pasuat suat ga; katanmai nai katanmai, kanuhmai nai kanuhmai akhanhlu takum chang kalison makjiu khat khat chariuhbo damh pon machamjiu tatien ten aruong-e. Miting haira daulak siak maksai chamai lupad, lu’ngutjiukalijuu makge.

(c) Chakoo kuhbo: Aliu Liangmai chengh ga kikhun khat niu marah-sha-thiyu-niyubo wan ga paky-palu tenwang tanglak siak mibo ga naikhat Naam mai mathiu meng chariuhbo kikhun tu nkhah khaibo setu ‘Chakoo kuhbo’ chiw kuhweh.

(d) Tiuhwi tiuhshabo machanh nchambo: Kiluong akhat ga maikhat niu chakhah-chagaa mey tadbo ga pamian maswui luhbo hai panam panah maigu rathoi pien gasu niuweh; nkiujiu pagu namruan lamsuh pasan shajiu kashai kathiyu paddi param mainiu patu nkhah raye chiw malumbo jengniu paliu damhdi bamme chiw lukhaijiu njankhai taanbo bamme.sidung sera:

(i) Alaan-thak Thiubo: Nam akhat ga maikhat niu chakhah-chami phung wangbowan ga pakyning mai maksai panamh mai mathiu leng maluat khat langtiuh suibo chakhah-chami njan khaibo tu ‘Alaan-thak thiubo’ chiw kuhweh.

(ii) Madombo; Mai khangkhat niu chakhah-chami meylu phung wangbo ga pachi singnah mai, pakyning mai khaddi panam panahmai mathiu leng alaan-thak thiuchang lakbo wan ga Mikang khat khat kalek chang njan khailu chunwibo dam puon machambo tu ‘Madombo’ chiw kuhweh.

(iii) Ganjan Tiuhbo: Kating maira kyhang kyri maksai kyning mai khaddi pachi singnah dungra tiuh wibo di tiuh shabodi khat khat leng ganjan tiuhjiu tiuhwi tiuh shabo tiuh macham, sak machamjiu lungbam niw-e. Haikumbo tu ‘Gan jan tiuhbo’ chiw kuhweh.

(iv) Chamih Matai: Apou ape dung ra kikhun ga chakhuong cha’ngee padsai panaai chamih mai leng kabuinen maksai chami nkhuong lyikhaijiu patan-panah tu maningtau taan tanne. Sikumbo tienkam tu ‘Chamih mataih’ pibo chiw kuhweh.

(v) Manaah Thyen: Kiluong ga maipui khat niu ngena lung misai sibo puileng kalek ky hina niu chakhah chami maksai marui kadii diibo ponlu meng thyen khaiye. Sichiwjiu, ngena lungbo pui kikhun mainiu paki lunlung shabamdi nammai niu thyenkhai bibo chakhah-chami niu tiuhlu pajeng tan majilu chaky chaluh thiulan nuong luweh.

(vi) Rihman Padbo: Mai khat niu kiluong ga khouraa khat kamshatlu phung wangsai naammai mathiu leng pipadjiu langktiuh machambo riga sibo khouraa rihman thiujiu kabak maksai kabui khat bishat khailanjiu namga katingmai mathiu tu pitiuh pisak khailanbo tu ‘Rihman’ pibo chiw kuhweh. Katingmai racham ga khouraa dung ra aliu chamai nai nchamboweh siniu paliu tu kamshat dasai Tingwang suong ga chakhuih makra chakhou kasiambo khatra papam leng kamshat khailan pacheng-e chiw dinne.

(vii) Rambow Majuokbo: Katingmai niu kiluong khen ga shingbang singnuu majuokjiu namlun pikam mawi khaibambo setu Rambow majuokbo chiw kuhweh. Rambow majuokbo hai palam nia sum bamme. Lamkhat niu Nam ga shingbang majuak khaijiu tadui akhun sangh makra; niabo ga chaluh chami thonbo wan ga maksai charammi tauwangbo wan ga chaky-chaluh chami niu kam matahmi makra; pasumbo ga tathiu-chari wan gadi nbaibam thiu; khaddi madaibo ga, tashing kashaibo sibo Rambow gasu maipui mainah niu akhoira leng-e. Nam rengmun garenbang kadii diibo pi pouk khaijiu sikumbo bang ga charah bamboweh chiw kapin kinbose nam ga maikhuon khuong kamak mainiu shingbang huithon mira kamanangbo jeng niw-e. Sikumjiu, duiruok machang ga charah bamme chagum bangh maksai shingbang hui dulo chiw kasanh kinbose shingbang shingnuu kam matah mibo ga tadui sanghmi ratu manangjiu dinboweh. Sichiwjiu, kating mai niu Rambow majuokbo se tuhoi kien gu scientific thiubo khaddi environment kam mawi khaibo tenduan kadiibo khatle.

(viii) Tasuat Wan: Kating mai kien gara chaky chaluh thiuloiluh tatien hahwang njiuh bimi dasai naam ga npui kafa, akhun chabuon mai niu kam mawi khaijiu maipui mainah chun pikim khaijiu lung-e. Haikumbo wan tu, ‘Tasuat wan’ chiw kuhweh. Haibo wan ga khangliw mai tashing chagum phung janjiu naam ga lung singkhiumai ky ga chakon konjiu paliu diw thiujiu lungbo wanneh.

Chakhuongh cham nai chaliyuh-raw thinbo

(a) Liangmai chengh ga naamai niu katingmai mun kakjiu tacham chalad faabo suimakge. Asuong katingmai niu tacham faasu misai maliyu mak nkingrai raye. Kating maidi mathiu charuong ga tacham faabo wan ga faajuong faabo suimakge.

(b) Maikhat niudi tathiu-chari ga papou zan thenbo makjiu pasuong katingmai zan kuhjiu maksai dinjiu chalad npaobo suimakge.Riliwmai/maipuimai dungdi pa-naaih zan kuhjiu khat khat tu

chakhuong thiujiu lungbam niw-e.

(c) Katingmai kien gara maileng wakhat pibo/janbo wan ga din suibo zanku kuhlu chakhuong cham dinjiu piye. Kalumai di chakhuong thiusuan khailubo saisu lubam niw-e.

(d) Liangmai chengh gara pasuong katingmai khat niu mathiu charuong ga tad wangbo wan ga chabam kengjiu bamtah di naamai hina chapkhang chabam kakhin pachengh-nge.

(e) Kikhun ga bidi mathiu charuong ga bidi kating mainiu machanrai makjiu pachun thiumibo naamai khat niu di katiuh-kasak tiuhrai makge.

(f) Kason kasha maitu tad daobo wan ga paliu bang jukha maksai phungkha makjiu tad majumi niuhwe chiw din bam niw-e.

(g) Chakhah chagah mye kiujiu maipui mainah tu thaodao misai paliu leng nang niu phung kinbo chakhah chagah kasiara paliu bang ga thon khaidia pachengh-nge.

(h) Tasiam siam kasi mainiu kamyih-magian khaddi papyuhmai kahahbo puileng nte,nmui, takem, diupung, tariangk khaddi langruike matha taliw khaijiu paliu chun kam mawi khaijiu papui papiu maksai papyuhmai ring nbaansat kabam mai suongdi kengjiu thinbam niw-e.

Chalyiuraw thinbo

Liangmai kating kien gara kiluong ga npui kafaa, duikhun talyiwra khat khat tu mataiajiu lungbam niw makge. Chabuonmai papum katan mai niu paliu puu thiujiu maksai chalyiuhraw thinjiu pawan kadaobo phuilu nkhi machajiu maipui mainah wa ka-manang hahjiu lungbam niw-e. Khangchiuh aliatjiu Namgu chakhuot karengk katinjiu lunge. Chaky-chalu thiumakjiu jeng 2/3 kiluong ga mathak khang misai ‘kiluong ruirengk’ chiw kuhwe sibo rambaa sera tatien thiu makehjiu kiluong maruireng kum ruonkin mai chiwbowe. Sichiwjiu,‘kiluong ruirengk’ dung chiw kuhmai niudi mai chalu lam tadkam mibo wan ga kiluong ga bamlu pahniu kam kasuibo namtien kamjiu lungbam niw-e. Chaky chalu maranmai dung niu di palu atiat mawi lujiu nam ga miukengh thiulusai miukengh bui pipadjiu panam panah mathiu tu katiuh keejiu panam panah pien gasu pah niu tasiuh kengluboweh chiwjiu chakhuongh thiukhaiye. Sikumjiu, panam panaa mai niudi takumwan wangbo ga paliu chun wijiu patu chakhuongh thiubo thiujiu sinapiw luh mathiu naikhat mengk cha’ngam kam nkhah khailan taanne. Sichiwjiu, Liangmai chengh ga malyi khat niu khat tu chakhuongh thiubo ronna makjiu malyi khat niu nampuinah tu chakhuongh thiubo khaddi panam panah mai niudi patu chakhuongh malan khaibo hai bamtaan tanhne.

Katingmai niu malum bam niwbo

A. (i) Singgiu ruak: Kating kien gara singgiu ruak ga puak bambo shingbangh, chagum bangh huithon makge; huithon maira parahraa simakjiu shairayeh chiw dinbam niw-e. Singgiu ruak ga tamut majungk khai pacheng makge, sikum maidung charah chamai shiang khungjiu parahpot simakbo rah marah siye khaddi shitdiuh shai siye chiw kapin kindiye.

(b) Wah khouky ga majungk khaibo/ makat sinbo: Matiangky khaddi katam tambo khouky ga majungk khaisai majungk shabo rah marah siye, Sikumbo chakhouky makat sin maksai laisin sai chakon tidsiye chiw dinbam niw-e.

(c) Nthingna sit lyibo: Nthingna sit pabum maksai papoi bamkhahbo ting ga kam masha makraye. Nthingna sit lyitaan mai pakai pakik tamme; pataa-panah lungdi kengju makge; chabuon ting ga shaisiye chiw dinne.

(d) Npui kafa kam tania niuhwe: Mathiu npui kafa ga majungk tamut khaibo,plam hahbo ga tashing tatu dengk khambo khaddi karaali thonkhai pachengh makge, plamra, npui ga tadken wangbo charah chamai shiang khungjiu aduon shaye chiw malumme.

B. Kashabo khaddi Maji makbo Malum

(a) Karaa-karoibo: Liangmai niu aliu chamai ncham karai tu karaa-karoibo leng madam khailu atuu aronna kamchariuhbo malumse Satan niu lungchun kamyih mibo malum khatle. Haibo malumse ‘paruak pamyi’ kahahbo nam ga khaddi zad ga chamchiuh wijiu lungmakra Satan niu thiukhaibo tathaak kawi khatle. Haibo malum niu nam ga kikhun wajiu mikdui kampad khaijiu Liangmai niu Tingwang gu Thoidam kam mahah bambo Tashiangh khatle. Tuhoi aliu Khristen thiulubo saihdi mai

kakeng niu satan kien kam madiijiu malum kinbo Satan gu benthin kawi khatle.

Dr. Hunibou Newmai hai Education Director, LNBA-(M)

ga thiu bamme.

Courtesy: ANP Magazine 2021 Issue Vol.3